Houprale (discramiaedje)

Çoucial, c' est ene pådje d' omonimeye, ki mostere les årtikes avou l' minme no mins so des sudjets diferins.

Les houprales u houlpéns et les houretes u hoûlotes, c' est des oujheas proylîs d' nute.

Dispårtixhaedje

Divins l' kessionaire, l' ALW les aveut dispårti inte «hibou» et «chouette».. Portant, tot scrijhant l' notûle, Marie-Guy Boutier si rindje dins l' riwaitaedje di l' inglès u do flamind ki n' ont pont d' mot diferin sorlon k' il ont des orayes u nén. Ces «orayes» la, ci n' est k' ene houpe di plomes, sins rapoirt avou l' schoûtaedje.

Gn a des sayes di dispårtixhaedje pus spepieus, avou les sincieus nos, dins l' motî d' Vervî a «houprale», dins Ene båke so les bwès d' l' Årdene p. 297 et divins l' motlî Dascotte so les oujheas. Dins l' Franwal Haust, gn a d' l' adire sorlon les mots francès a «hibou», «chouette», «effraie», «chevêche».

Rindjmint sincieus ezès familes

Tos ces oujheas la apårtegnnut al famile des houpralidîs, apus ki l' hourete di clotchî k' est rindjeye dins l' famile des titonidîs.

Rindjmint Wikipedia

Po les houprales k' on rescontere e l' Walonreye, l' eciclopedeye asprouve di fé l' sinteze des dnêyes des motîs insi:

houprales sins orayes

(del pus grande al pus ptite)

• li hourete di bwès ou grande hourete u houprale di bwès u tchet d' nute u gnåwete u tchafô u hoûlote (Strix aluco)
• li hourete des tchamps ou pitite hourete u pitite houprale u pitite souwete (Athene noctua)
• li hourete di clotchî ou houprale di clokî ou blanke hourete (Tyto alba)

houprales ås orayes

(del pus grande al pus ptite)

• li duk di rotche u duk di houlote u grosse houprale (Bubo bubo)
• li houprale di fagne (Asio flammeus)
• li houprale ås orayes u l' duk ås orayes u l' duk di bwès u l' tchet-coirnou (Asio otus)
• li ptit tchafô u pitit houlpén (Otus scops)