André Gauditiaubois

croxhî pa José Schoovaerts

André Gauditiaubois, c' esteut on scrijheu e walon, k' a bråmint fwait des cåzaedjes di tchansons.

Il a skepyî a Dårmè li 2 d' awousse 1949. Il a morou a Gochliye li 28 di may 2021.

Ouve e walon

Il a-st aprins l' walon avou s' grand-mame di Nivele, et a cmincî pa spepyî l' Coppens, po ecråxhî s' vocabulaire. Mins il a raddimint rcweri ses mots did pattavå l' Walonreye, et minme sicrire des tchansons avou l' accint d' Lidje u di Ståvleu.

I fourit purade kinoxhou come cåzaedjisse da William Dunker, mins il a fwait eto des paroles po mo des djonnès tchanteus et tchanteuses. Eto, il a "wangnî" dipus d' on côp des pris å Grand Pris del Tchanson e walon, pu des Fiesse del Tchanson e walon.

Il a eto scrît des noveles.

Il a scrît on tchaptrê do live Ké walon po dmwin ?, adjinçné pa Lucyin Mahin.

Riprins dins l' antolodjeye "Po les dijh ans do ptit".

Stéphane Quertinmont a hintche avou André Gauditiaubois padrî a droete, e 2000

Sovni di s' moirt dins l' Rantoele-gazete

Vola cmint ki s' moirt fourit-st anonceye dins l' Rantoele-gazete:

André Gauditiaubois a dhoté a Gochliye li 28 di may 2021.

Li walon pied on grand ome, ki n’ aveut nén sogne di mostrer k’ i n’ esteut nén d’ acoird avou les pus wårdiveus dins les waloneus. Et ki l’ walon si dveut poleur tchanter di Lidje a Tchålerwè avou les minmes tchanteus, et des tecses rimetåves e rfondou.

Dandjreus k’ i wigne co dins les penes e paradis cwand il î rescontere des waloneus wårdiveus, mins k’ il a fwait camaeråde avou les Forir, Pirsoul, Boxus, Albert Lallemand, Rodjî Viroux et Francis Baudoux (ki n’ estént nén todi d’ acoird avou l’ eståvlixhmint).

Årvey, André ! Dj’ årans l’ tins long après twè, al soce Li Rantoele, la k’ to nos evoyives voltî tes tchansons (dji m’ permete di l’ atouwer ca c’ esteut on vraiy soçon).

Hårdêyes difoûtrinnes

• Li Wiccionaire si rsieve di sacwantès fråzes da André Gauditiaubois po-z enimådjî des mots k' i gn a.
• Pådje moennrece des scrijhaedjes André Gauditiaubois (so l' Aberteke) (e rfondou)
• Sacwants scrijhaedjes (sol waibe "Li walon d' emon nozôtes") (mwaissès modêyes)
• (fr) Schoûtez ses powinmes et tchansons