Ewoeye di Tossint

Pol discramiaedje des årtikes avou l' mot « ewoeye », loukîz cial.

Efants ås ouxhs po briber des boubounes

L' ewoeye di Tossint ^{aschoûtez lu}, classicmint l' Alowine, lomêye eto el shijhe ås grigne-dints u li fiesse ås grigne-dints, c' est ene fiesse po les efants k' etervént tins del shijhe do 31 d' octôbe, dj' ô bén, li woeye del Tossint.

Djoûs del Tossint

31 d' octôbe	1î d' nôvimbe	2 d' nôvimbe
Ewoeye del Tossint	Tossint	Djoû des åmes

Istwere

Elle a cmincî a esse fiesteye el Walonreye dins les anêyes 1990, vinant des Estats Unis.

Mins si peur sourdant, c' esteut dins l' tuzance gayele. Ele s' î loméve fiesse del Samin.

Dispu les anêyes 2010, ele si fwait tote li samwinne divant l' Tossint, la k' les efants sont-st e condjî (condjî d' Tossint, ribatijhî ripoize do waeyén-tins).

Come di djusse, c' est l' ocåzion po les grands botikes di vinde totes sôres d' ahesses po gåyoter les måjhons et po dguijhî les efants. Gn a eto des etrevéns a pårt avou des standes di sbarmint dins les djouwreyes touristikes (Walibi, dominne do Trô d' Han).

• 
  cawoûte ricôpêye a môde di grigne-dints
• 
  divanteure gåyotêye po l' Alowine
• 
  Peturon et sinte-Catrene
• 
  efants vinant briber ås boubounes dedja å 27 di nôvimbe

Dins les belès-letes e walon

Jean Goffart plaece ene di ses noveles di «Djins d' amon nozôtes» djusse divant l' Alowine.

El peneuse niût do 31 d' octôbe s' aprestéve a grands côps. Nos esténs a deus samwinnes del fiesse des citrouyes. Dins tos les botikes, les håynaedjes fijhént pinser a l' oreur. Les araegnes texhént leus toeles el pus foirt k' ele plént, avou, e mitan, les biesses les pus laides possibe.

Sins rovyî l' antomeye metowe dins l' werene do botchî. Paretreut minme k' il esteut d' fier.

Eyet les disgostantès tchawes-soris, les eskeletes, les masses da Fredi k' on rescontréve dins bén des dvanteures di botikes.

On ptit live d' imådjes di Odysseus, Abèl & Bèlina s’ disguîjenut po l’ chîje aus grigne-dints, a stî rmetou e walon d' Nameur pa Julien Noël.