Bas Payis otrichyins

Pol discramiaedje des årtikes avou l' mot « Bas Payis », loukîz cial.

Les Bas Payis otrichyins, c' esteut èn estat elaxhî a l' Impire d' Otriche ki respond al pårteye nonnrece do Benelusse d' asteure, cwand on-z a rsaetchî evoye li Principåté d' Lidje eyet l' Dutcheye di Bouyon.

Mwaissès dnêyes

Les mwaisses pus cnoxhous fourît l' Imperresse Mareye-Tereze (k' esteut veyowe voltî) eyet l' Impreu Djôzef II (k' esteut veyou evi).

Il a shuvou li redjime des Bas Payis espagnols, e 1714, pask' i gn aveut pupont di dschindant po les Habsbourg d' Espagne. Adon, li payis a rivnou al coxhe di famile des Habsbourg d' Otriche.

Après l' Revolucion braibançone (1789-80), les Bas Payis otrichyins seront shuvous, e 1795, do Redjime francès.

So les limodjes avou l' Principåté d' Lidje, les teres des Bas Payis Otrichyins estént sovint lomêyes «Payis do Rwè».

Djeyografeye des Bas Payis otrichyins

Gn aveut, po dire djusse, ezès Bas Payis otrichyins :

li Dutcheye do Lussimbork (asteure, on boket el Walonreye + tot l' Grande Dutcheye do Lussimbork + on boket e l' Almagne + on boket el France)
li Dutcheye do Limbork (asteure bråmint ezès Bas Payis, on ptit boket el Walonreye)
li Dutcheye del Braibant (pårti asteure inte li Walonreye, li Flande, li Redjon d' Brussele et les Bas-payis)
li pårteye nonnrece del Dutcheye di Guele (Guele otrichyinne, (asteure ezès Bas Payis)
li Conteye di Nameur (asteure pår el Walonreye)
li Conteye di Flande (asteure pår el Flande)
li Conteye do Hinnot (asteure pår el Walonreye)
li signorreye di Malene (asteure pår el Flande)
li signorreye di Tournai eyet l' Payis d' Tournai (asteure pår el Walonreye)