Bas Payis otrichyins
Les Bas Payis otrichyins, c' esteut èn estat elaxhî a l' Impire d' Otriche ki respond al pårteye nonnrece do Benelusse d' asteure, cwand on-z a rsaetchî evoye li Principåté d' Lidje eyet l' Dutcheye di Bouyon.
Les mwaisses pus cnoxhous fourît l' Impratresse Mareye-Tereze (k' esteut veyowe voltî) eyet l' Impreu Djôzef II (k' esteut veyou evi).
Il a shuvou li redjime des Bas Payis espagnols, e 1714, pask' i gn aveut pupont di dschindant po les Habsbourg d' Espagne. Adon, li payis a rivnou al coxhe di famile des Habsbourg d' Otriche.
Après l' Revolucion braibançone (1789-80), les Bas Payis otrichyins seront shuvous, e 1795, do Redjime francès.
So les limodjes avou l' Principåté d' Lidje, les teres des Bas Payis Otrichyins estént sovint lomêyes "Payis do Rwè".
Djeyografeye des Bas Payis otrichyins[candjî | candjî l’ côde wiki]
Gn aveut, po dire djusse, ezès Bas Payis otrichyins :
- li Dutcheye do Lussimbork (asteure, on boket el Walonreye + tot l' Grande Dutcheye do Lussimbork + on boket e l' Almagne + on boket el France)
- li Dutcheye do Limbork (asteure bråmint ezès Bas Payis, on ptit boket el Walonreye)
- li Dutcheye del Braibant (pårti asteure inte li Walonreye, li Flande, li Redjon d' Brussele et les Bas-payis)
- li pårteye nonnrece del Dutcheye di Guele (Guele otrichyinne, (asteure ezès Bas Payis)
- li Conteye di Nameur (asteure pår el Walonreye)
- li Conteye di Flande (asteure pår el Flande)
- li Conteye do Hinnot (asteure pår el Walonreye)
- li signorreye di Malene (asteure pår el Flande)
- li signorreye di Tournai eyet l' Payis d' Tournai (asteure pår el Walonreye)