Cameron Tucker

Èn årtike di Wikipedia.
Sauter à la navigation Sauter à la recherche

Cameron Tucker - u djusse Cam - est on forveyowe djin (persounaedje), do fime Modiene famile, djouwé pa Eric Stonestreet.

Eric Stonestreet, ki djowe Cam Tucker.

Cam a crexhou al cinse ene sawou dins l' Missouri. Poy il a stî cloune di s' mestî. Po fini, il a rescontré Mitchî, et s' mete e manaedje zels deus, et dmorer a Californeye, dins ene måjhon so l' minme strêye ki l' bele-famile.

Cam et Mitchî ont afiyî ele båshele do Vietnam, ki s' lome Lili. Li båshele poite li no d' famile di s' pa Pritchett, mins s' deujhinme pitit no est Tucker. Come li Vietnam ni permet nén l' afiyaedje des efants pa des côpes di deus omes, ça vout dire ki Mitchî a afiyî Lili come tot seu di parint, et k' Cam l' a rafiyî pa afiaedje ådvins, on côp ki l' efant esteut ås Estats-Unis. Li côpe a vlou afiyî on deujhinme efant, mins i s' ont rapinsé.

Pus tård dins l' fime, cwand l' mariaedje a divnou permetou po tertos, Cam et Mitchî s' ont maryî.

Cam a leyî djus s' prumî mestî, po esse pere al måjhon. Pus tård, cwand Lili esteut pus grande, Cam a rataké a bouter, aprume come prof di muzike (i djowe del batreye et do piano), poy di spôrt, et po fini come aidant-directeur del sicole.

Al dilongue do fime, Cam est foirt djan-comere, dins totes ses manires, åré po li spôrt. Åd contråve del pus grande pårteye des gaiys, Cam est assaetchî på fotbale. Come i provént d' ene famile di cinsîs, il a todi l' boune mwin po fé tot çou k' i fåt fé dins l' måjhone.

A môde di s' bea-fré Fil, Cam saye di totes ses foices di plaire a leu bea-pere Djaiy, mins ça toûne todi a rén. Cam est foirt amice avou s' bele-maråsse Gloriya.

Å cmince, li manaedje n' esteut propietåre fok do plantchî d' flaxhe del måjhon. Pus tård, il ont atchté l' apårtumint ådzeur, po l' sawè louwer a des djins, et fé sacwants cwårs foû d' ça. Mins l' côpe a todi bon cour, et i ramasnut totès sôres di barakîs, et lzè lodjî. Li påye del côpe est tofer ctapêye pa l' sour da Cam, ki c' est Pam. Pam est ene metchante feme, tote seule mere d' on ptit valet. Cwand Pam est e prijhon, c' est l' côpe Cam et Mitchî k' aclevnut l' råpén.

Cam est on parint tot souke tote låme, trop permetåve avou Lili.

Come cloune, Cameron esteut li persounaedje Fizbo. Il a todi s' costume di cloune, ki tote li famile voet evi, et s' moussî e cloune di tenawete.

Cam a todi des crijhes sintimintreces. Il atake tofer a braire, i boele pacôps, il moenne araedje sovént, et pôreut vali k' i gn euxhe nouk so s' voye cwand ça lui arive.

Cam a skepyî on 29 di fevrî. Adon i n' si fiesteye fok on côp tos les cwate-z ans, çou ki fwait k' i vout todi des grandès fiesses po ses ans.

Acteur et persounaedje[candjî | candjî l’ côde wiki]

L' acteur Eric Stonestreet n' est nén gaiy, ey i n' a måy sitî avou des omes.

Tolminme, Fizbo est l' persounaedje clounrece di l' acteur. C' est Eric Stonestreet k' a stitchî s' persounaedje Fizbo divins Modiene famile.