Circût d' Francortchamp

Èn årtike di Wikipedia.
Li plan do circût d' Francortchamp, la come il est pol Grand Pris
Li "Gritchete" u "Roedion", å trevåtchaedje del vå del Rodje Aiwe

Li Circût d' Francortchamp (lomé eto les zigzags di Spå), c' est on circût po les coûsses d' otos et d' motos, k' est metou so l' ancyin ptit ban d' Francortchamp. Il est purade kinoxhou på Grand Pris d' Beldjike d' otos d' coûsse eyet pol coûsse d' edurance des 24 eures di Spå, mins i gn a totes sôres di coûsse ki s' î fjhèt.

Discrijhaedje[candjî | candjî l’ côde wiki]

C' est on circût pol vitesse (on pout griper disk' a 300 km/h), avou des tienes; il est ossu rlomé pask' on boket do circût pout esse bén setch, dismetant k' i ploût so èn ôte, çou ki fwait k' les moenneus des vweteures divèt adapter leu moennaedje inte les bokets setchs et les bokets ki sont frexhs et ridants.

Li pus cnoxhou boket c' est l' "Gritchete" u "Roedion", sol trevåtchaedje del vå del Rodje Aiwe, c' est on boket målåjhey po les moenneus d' vweteures, la k' c' est sacwants tournants ki s' shuvèt did foirt près.

Rilomêye[candjî | candjî l’ côde wiki]

I gn a bråmint des moenneus et des rwaitants k' veyèt voltî l' circût.

Des cis k' i gn a l' cwålifièt come li circût l’_pus bea del Daegne. On ndè pout citer sacwantes : Kimi Räikkönen, Robert Kubica, Rubens Barrichello, Jenson Button, Fernando Alonso, Lewis Hamilton, Heikki Kovalinen et bén seur Michael Schumacher, li moenneu k’ a l’ pus grand nombe di victweres a Francortchamps avou shijh succès.

Istwere do Circût d' Francortchamp[candjî | candjî l’ côde wiki]

Li circût stî fwait e 1921 pa Jules de Thier et Henri Langlois Van Ophem. El traecî d’ adon di 14,981 km aveut l’ fôme d’ on triyingue åtoû des veyes et viyaedjes di Francortchamp, Måmdey eyet Ståvleu. Il esteut fwait dins des tchmins publikes drovous a l’ circulåcion do tins k’ i gn aveut pont d’ coûsses.

E 1921, gn a ddja yeu ene coûsse di motos et e 1922 ene coûsse d' edurance po des otos ordinaires.

E 1924, ci serè l' prumî Grand Pris po les oto d' coûsse di Fôrmule F (24 eures).

E 1925, c' est a Francortchamp k' i gn è va aveur li Grand Pris d' Urope.

E 1939, on fjha on novea circût di 14.120 metes avou l' fameus « roedion d’ el Rodje Aiwe ». La, el viraedje e-n « U » a stî replaecî pa on tournant pus stroet et pus rapide k’ est dvinou el rilomé « tournant del gripete ».

Li crawiaedje a stî ene miete amidré dins les anêyes 1970, di cåze des rclamaedjes des pilotes. Tachie Stewart aveut yeu la èn accidint e 1966, et c' est lu k' esteut li moenneu del binde.

E 1983, li novea catoû a stî ramoenné a 7 km (7.004 metes) di longueur so on traecî bråmint moens riskeus. Il est rapide eyet vålné, come tote l' Årdene, åresse. I rprind ene pårteye di l’ ancyin. Les bolides polnut dispasser les 320 km pa eure.

E 2007, après sacwants anêyes sins Grand Pris, gn ourit troes candjmints :

  • el nouve tchicane ki candje di costé avou ene coûte rintrêye po l' ravitaymint
  • l' alårdjixhmint del droete lene eyet on pus grand disgadjmint a l' sôrteye
  • on grand disgadjmint dins l’ tournant k' on lome di « l' antene cérudjicåle »[1]

Ôtès coûsses corowes sol circût[candjî | candjî l’ côde wiki]

  • les World Series d' Renault
  • les 1000 km di Francortchamp
  • les shijh eures di Spå
  • el RMU Classic
  • les Bikers Classic
  • les 12 eures BTCS.[2]

Difoûtrinne hårdêye[candjî | candjî l’ côde wiki]

Waibe oficire do Circût d' Francortchamp

Sourdants[candjî | candjî l’ côde wiki]

  1. Jean Goffart, Li Rantoele l° 43, ivier 2007-2008 & l° 75, waeyén-tins 2015.
  2. Jean Goffart, Li Rantoele l° 75, waeyén-tins 2015.
Commons
Commons
I gn a so les cmons Wikipedia des imådjes ou fitchîs son a vey avou l' circût d' Francortchamp .