Corone des Avéns

Corone des Avéns, avou 4 grandès tchandeles po les dimegnes et 24 po les ôtes djoûs.

Li corone des Avéns, c' est ene uzance k' a ataké e l' Almagne e 19inme sieke, et si spåde après.

C' est ene corone fwaite avou des vetès coxhes, et des tchandeles sitampêyes dissu, et k' on-z emantche po les Avéns. L' idêye, c' est d' esprinde ene tchandele di pus tchaeke djoû, u tchaeke samwinne ki raprepeye les creyants do Noyé.

Li corone des Avéns pout esse basteye avou des coxhes di sapén, di spenes, di suzea u di des ôtes bouxhons des håyes.

Les corones simpes ont cwate tchandeles po les cis k' ont des Avéns di cwate samwinnes, et shijh po les cis k' ont des Avéns di shijh samwinnes. Les cis ki volnut fé ene grande corone, metnut ene tchandele po tchaeke djoû des Avéns. Mins, mågré tot, les tchandeles ki rprezintnut les dimegnes sont pus grandes ki les ôtes.

Corone des Avéns avou 7 tchandeles: 5 bleuwes po 5 dimegnes; 1 rôze, pol dimegne Gaudete, 1 blanke å mitan, pol djama d' Noyé.

Les tchandeles sont normålmint des minmès coleurs ki les mousmints di messe do tins des Avéns : violé ou bleu. Mins, po troejhinme dimegne des Avéns - li Gaudete - gn a ene rôze tchandele, come les abiymints do curé et les drapreyes di l' åté po ç' dimegne la.

Asteure, on n' fwait pus des corones avou ene loumire po tchaeke djoû, mins seulmint po les dimegnes, et ça fwait cwate tchandeles, ou cénk, si on mete co ene blanke å mitan, pol djoû do Noyé. Li cene k' on aloume li prumî dimegne, on l' lome li tchandele do profete, a cåze des lijhaedjes, la k' on lét li profete Izayî dins les eglijhes. Li deujhinme, c' est l' tchandele di Betleyem, li troejhinme li cene do bierdjî, li cwatrinme li cene di l' andje.

Dins les eglijhes k' ont les Avéns pus longs, di shijh samwinnes, li corone des Avéns poite shijh loumires, ou set, s' i gn a ene dierinne pol djoû do Noyé.

Istwere

Li prumire corone des Avéns a stî fwaite pa Johann Hinrich Wichern (1808–1881), èn acsegnant d' efants et teyolodjin luteryin d' Ambôr. I purda avou lu sacwants efants foirt pôves et mete so pîs ene måjhone d' orfulins, lomêye "Rauhe Haus".

Les efants dmandént sovint cwantes djoûs gn aveut i co disk' å Noyé. Po k' les efants n' el dimandénxhe pus, e 1839, il a fwait ene corone di legne, avou 19 pititès rodjès tchandeles et 4 grandes et blankes. Tos les djoûs, les efants aloumént ene tchandele di pus, po pleur conter les djoûs, tantea k' a Noyé, elle estént esprindowes tertotes.

E 1860, il a rfwait li minme corone, mins avou des vetès coxhes et dispoy, cisse corone a moussî ezès måjhones.

Dins les anêyes 1930, on-z a cmincî a l' mete dins les eglijhes e l' Ôtriche ey e l' Bavire, et adon pattavå.