Crodjambot del bijhe

On crodjambot del Bijhe, c' est on crodjambot ki håbite li vint d' bijhe, et ki va picî les lepes, li nez u les doets des efants, s' i moussèt foû pa ç' tins la.

Gn a sacwants crodjambots del bijhe el Walonreye :

• Djihene del Bijhe, ki dmeure el Fåmene. Ele apice les efants ki rexhnut foû del måjhon cwand i bijhe.
• Pépé Djhan Bijhon, ki dmeure so Smwès, avou ses aidants, les Spiçons (la-minme : les Spinçons) ki broûlèt les ongues des efants ki vont a l' ouxh cwand i djale.
• L' Oujhea å Rodje Betch u li Colon å Rodje Betch u li Cok å Rodje Betch. E sacwantès plaeces, on racourtixh si no : Clôrobetch, Colôrobetch, Corobetch. I dmeure el Hesbaye, e Condro, e l' Årdene. I vs betche et vos fwait des sbijheures si vos moussîz foû et k' i bijhe. I vs piçrè på nez et vos î hagnî.