Aller au contenu

Droles di biesses (live d' imådjes)

Èn årtike di Wikipedia.

Drôles de biètes

Pol discramiaedje des årtikes avou l' mot « Droles di biesses », loukîz cial.

Droles di biesses, c’ est l' tite e walon d' on live d' imådjes sicrît aprume e picård pa Christelle Lemaire (sol tite «Drôles de biètes».

Les desséns sont da Caroline Lemaire.

Il a stî publiyî e 2023 ås « Noer Dessén » dins l’ coleccion « Les Bablutes », divins cwate diferins accints do walon.

ISBN 978-2-87351-399-3 (modêye di Bastogne).

ISBN 978-2-87351-398-6 (modêye di Tchålerwè).

Modêyes coinreces[candjî | candjî l’ côde wiki]

Po l’ Basse Årdene, c’ est Michel Francard k’ a fwait on tradujhaedje avou les piceures do payis d’ Bastogne.

N a-st eto des modêyes po l' walon do Mitan (pa Anne-Marie François), li walon do Coûtchant (pa Jean-Luc Fauconnier) eyet l' walon do Levant (pa Paul-Henri Thomsin).

Prezintaedje[candjî | candjî l’ côde wiki]

Nos estans dins ene iye des Carayibes lomêye « Bénlonlåvå » (bén lon låvå). L’ istwere kimince pa on disbåtchant messaedje dins l’ posse :

« Prindoz bén asteme, binamêyès schoûteuses, et vos, tchers schoûteus ! Çou ki vs alez etinde, ci n’ est on boigne conte ni on pexhon d’ avri ! Drovoz vos schoûtoes grand å lådje.

Noste adjince meteyo vént d’ nos anoncî li tins k’ i dvreut fé dins les djoûs a vni. Ene timpesse, ki les sincieus ont batijhî « Kébazår », s’ a co refoirci enawaire. Elle a divnou on teribe sitron-d’-pourcea tropicå. I porshût si tchmin dins les iyreyes å Levant, et tot bouxhî djus la k’ i passe. On l’ ratind après mon nozôtes, dandjreus å cmince del samwinne ki vént. Li diåle serè dins les airs, et sorlever, metans, des waches dipus d’ set metes hôtes. Li vint shofelrè a do 150 kilometes a l’ eure, sins criyî foirt. » Adon, nos fårè s’ tini ås coxhes !

Camecoma a stî tot drole cwand il a-st oyou ça å posse. Maria Deyî ! Si bele iye di Bénlonlåvå aléve esse distrûte.

Camecoma overe dins on ptit zô. Il est tot dislofré. I sondje a ses pôvès biesses : li djirafe, li zebe, l’ olifant et l’ rinocerosse. Il esteut vormint ratchimi après ses biesses : il åreut dné si tchmijhe po k’ elle åyénxhe bon.

Tot d’ on côp, l’ imådje di s’ mononke Ademår lyi aspite divant les ouys. Si mononke dimoréve divins on ptit viyaedje di Walonreye. C’ esteut l’ fré di s’ mame ki s’ aveut amouraedjî d’ ene tourisse walone k’ aveut vnou passer des vacances dins l’ iye. Il aveut tot plaké po-z eraler avou leye.

Li mononke Ademår aveut ene bele pitite cinse å mitan des tchamps. I n’ î aclevéve ki kékès biesses. I sereut surmint d’ acoird po lodjî les cwate soçons-biesses da Camecoma.

Lu oyi, mins les ôtès biesses del cinse, sabaye ?[1]

Alére[candjî | candjî l’ côde wiki]

  • Jean-Luc Fauconnier, « Drôles de biètes, une nouvelle parution dans la collection Lès Bab'lutes », dins El Bourdon,  756, may 2023, pp. 2-3.

Hårdêye difoûtrinne[candjî | candjî l’ côde wiki]

Sourdant[candjî | candjî l’ côde wiki]

  1. Come apresté e rfondou pa Lucien Mahin li 2 d' may 2023 ås scoles di Bive (avou l' modêye di Bastogne dizo les ouys)