El deure voye (teyåte)

Èl dûre voye

El deure voye (Èl dûre voye), c' est on djåzant keur sicrît pa Georges Fay après l' guere di 40, mins seulmint eplaidî e 2021.

ISBN 978-2-931107-02-7

Istwere di l' ouve

Li tecse n' esteut tapêye k' a môde di foyous agrapés po les comedyins k' el djouwént.

L' ouve a fwait prumî pris a ene bate di scrijhaedjes ALWAC e 1958. Pu, avou deus ôtes ouves, il a rascodou l' pris do Hinnot di belès-letes e walon e 1959.

Come pîce radiofonike, il a passé so Radio Hinnot (INR) li 3 d' octôbe 1959.

Il a eto stî djouwé divant l' publik å Moncea pal dramatike «Por yeusses».

Tinme

C' est l' moes d' maiy. C' est l' prétins. Tote li nateure est bele et les djins sont fén binåjhes. Et danser et tchanter des airs di totavå l' Walonreye:

Tra deri deri dera / M' djouwixhance / Mi c' est l' danse.

C' est dmwin li djoû di m' mariaedje…

Prindoz vosse baston, Simon, et s' moennez nosse cråmignon.

Vive Djandjan, vive Djandjan, c' est l' pus vî ome di Nivele.

Mins les muzikes do bontins vont bénrade esse schovêyes evoye på brut di l' abrocaedje des Almands e moes d' may 1940 ki «rvegnnut distrure, touwer, pingnî dins tot».

Les omes doeynut cwiter leu mestî po fé sôdår:

Marixhå, tape èt mårtea a costé di ti eglome !

Houyeu, ki l' kénkinisse erpinde èt lampe a s' clå !

Martchand, sere èt botike, cinsî, rintere tes tchvås ! (…)

Et vozôtes k' aveut cint mestîs, il est trop tård

Po roemyî, po berdeler, po candjî d' voye.

Kine ! Vos avoz pierdou ! La k' on rabate vos royes.

Vos n' avoz pus k' on no po tertos, c' est «sôdår».