Jean-Marie Lecomte

(e 2003)

Jean-Marie Lecomte, a skepyî a Brussele, li 23 d' may 1925 ey a morou a Lidje li 12 di måss 2008. Mins il a crexhou a Brå-dlé-Lierneu.

Di s' mestî, il esteut pere djezwite. Si a-t i passé ene grosse pårt di s' vicåreye (39 ans å long) e Congo.

Ouve pol walon

C' est onk des pus grands ratourneus di des tecses rilidjeus e walon.

Il a rmetou e walon les Evandjîles sorlon sint Matî (imprimateure do 4 d' awousse 2000), et sorlon sint Djhan (imprimateure do 19 d' awousse 2002).

Adonpwis, il a translaté l' Ouve des Apoisses (imprimateure do 22 d' decimbe 2003). I l' a eto eredjistré so cassete.

Il a-stafistolé et rexhe so papî les Evandjiles sorlon sint Luk (imprimatur do 2 d' octôbe 1999); sorlon sint Mår (imprimatur do 6 di decimbe 2001), les cenes k' avént stî ratournêyes pa Joseph Mignolet.

Il a scrît pol Rantoele eyet pol Walone. I meteut voltî so les fis ses ratournaedjes des sints lives.

Ratournaedje d' ene priyire

Priyire da Sint Ignace

Purdoz, Signeur, et acceptez

Tote mi liberté,

Tot çou k’ dji m’ sovén, tot çou k’ dji comprind,

Et tot çou k’ dj’ a, et k’ est da minne,

C’ est Vos ki m’ les a dné : vola ki dji vs les rind.

Totafwait est da Vosse.

Fijhoz è tot çou k’ Vos vloz.

Dinez m’ seulmint l’ gråce di vs inmer

Et d’ viker e vosse påye. Ci serè bon assez.

Åmen.

Ritchesse do ratournaedje

Cwand gn a l' minme mot u fråze di rvént tofer ezès sints scrijhaedjes, i n' el ratoûne nén del minme façon tchaeke côp, minme ådvins do minme live. Metans, εὐδόκησα:

c' est d'vins li ki dj' a mètou tot m' coûr (Matî 3:17)

c' est dvins vos ki dj' a metou tot m' cour (Luk 3:22)

c' est d'vins li k' dj' a mètou tot m' plêzir (Matî 17:5)

c' èst vos ku dj' inme du tot m' coûr (Mår 1:11)

ki dj' a tchûzé (Matî 12:18)

il a plait (Luk 12:32)

Poy k' e l' oridjinå grek, gn a pont d' adire, on s' åreut atnou k' e walon, ça fouxhe parey eto. Metans, po Mignolet c' est todi: «dj'a mètou mès complêhances».

Hårdêyes difoûtrinnes

• Si pådje so l' Aberteke
• Si otobiyografeye (avou l' accint d' Lierneu)
• Ouve des Apoisses
  • Tecse e rfondou avou hårdêyes odio (so l' Aberteke)
  • Mwaisse modêye, avou l' accint d' Brå-dlé-Lierneu
  • Montaedje videyo do prumî tchaptrê
• Evandjîles
  • Ratournaedje di l' Evandjîle sint Matî (avou l' accint del Hôte Årdene).
  • Ratournaedje di l' Evandjîle sint Mår (avou l' accint del Hôte Årdene).
  • Ratournaedje di l' Evandjîle sint Luk (avou l' accint del Hôte Årdene].
  • Ratournaedje di l' Evandjîle sint Luk (ene miete rifondou, nén co rcoridjî pår)
  • Ratournaedje di l' Evandjîle sint Djhan (avou l' accint del Hôte Årdene]
  • Ratournaedje di l' Evandjîle sint Djhan (ene miete rifondou, nén co rcoridjî pår)
• Li Wiccionaire si rsieve di sacwantès fråzes da Jean-Marie Lecomte po-z enimådjî des mots k' i gn a.