Les Dames di Mouze
Les Dames di Mouze, c' est troes gros pegnons d' rotche dins on distoû d' Mouze, 400 metes hôts eneviè l' mér, 260 metes hôts eneviè l' livea des aiwes di Mouse.
Les Dames di Mouze si trovèt al rexhowe do viyaedje di Laifour (dipårtumint des Årdenes francesses, Walonreye di France) tot nd alant so Rvin, sol hintche erive di Mouze. Li plaece est covrowe di faws.
C' est l' pus ancyinne pårteye di l' Årdene, eyu ç' ki Mouze a dvu cåvler ene fonde valêye po passer.
Li ledjinde
[candjî | candjî l’ côde wiki]Dins les anêyes 1080, troes tchvolîs, Heribrand, Wåtî et Djofrwè, les valets då signeur d' Idje, marièt Berte, Hodiere et Idje, les båsheles do signeur di Rethel. Les tchvolîs evont avou Godfrwè d' Bouyon pol prumire croejhåde et leyî l' tchestea a leu feme por zeles el wårder. Mins vola ki, sol tins k' i sont evoye, ele si disrindjèt; si bén ki, li minme djoû ki Djeruzalem est prindowe, li bon Diè s' måvele sor zeles et les candjî a rotches: c' est les Dames di Mouze.