Paul Depas
Paul Depas a skepyî a Wernant diviè 1903. Il a morou a Hu diviè l' 15 di måss 1998.
Il esteut po-z esse riprins dins l' pordjet (nén adiercî) d' antolodjeye des scrijheus e walon do Payis d' Hu.
Cårire come teyåtreu e walon
[candjî | candjî l’ côde wiki]C' esteut on scrijheu d' operetes e walon (ey e francès), et ndè scrire lu-minme li muzike. Il a toirtchî 97 akes d' operete e francès, et 71 e walon. Il a eto monté troes rvuwes ki fourît djouwêyes å "Trocadero d' Lidje".
Ene di ses pus rlomêyès pîces, ci fourit "Si prumî bal". C' est dandjreus li prumire pîce e walon k' i scrijha. Li prumire operete e francès si loméve "Le vieux mendiant" (li vî bribeu).
Il a eto scrît des ptits arimés po ls efants, et des tchansons e walon.
Il fjheut imprimer lu-minme ses pîces so des ptits livrets. I s' ocupéve lu-minme di vinde les abondroets pol djouwaedje so sinne. Adon, i coreut d' on viyaedje a l' ôte po-z aidî les comedyins et les mwaisses del djowe.
Il aveut rescontré Lambert Lemaire après l' guere di 40. C' est lu ki rmeteut ses pîces e walon. Cwand Lemaire est moirt, i s' a metou a scrire e walon.
E 1976, il amonte on comitî di walon e scole a Hu, ki va fé des bates di djhaedjes di bokets e walon dipus d' 30 ans å long.
Il a ossu scrît des messes polifonikes.
Di s' mestî, il esteut mwaisse di scole a Vieme.
Si mwaisse pasmint d' tins, c' esteut l' muzike. On vout k' il åye abocté lu-minme si prumî violon a ût ans. I djouwéve eto do piyano, del trompete et do sacso.
Sacwantès pîces di teyåte da sinne
[candjî | candjî l’ côde wiki]
- Si prumî bal (3 akes)
- Al blanke cinse (3 akes)
- Marians nos (3 akes)
- Froufrou (3 akes)
- A vos ôrdes, Mamzele (3 akes)
- Marinète (3 akes)
- Cwand l' redjimint passe (3 akes)
- Sondje di dactilo (3 akes)
- Li miråke d' amour (3 akes)
- Vive li marieye (3 akes)
- Li mononke dè Canada (3 akes)
- Ene bele garce (3 akes)
- Les ailes dè bouneur (3 akes)
- Li gård do Floribwès (3akes)
- Li scret d' on radjoû (3 akes)
- Po l' amour d' on lieutnant (3 akes)
On boket po ls efants
[candjî | candjî l’ côde wiki]- Mi ptit doet
- Mi, k' est tot ptit, dj' a-st on ptit doet
- Ki, paret i, fwait l' racuzete.
- Si dj' di ene boude, mi mame, tot fén droet
- Kessione mi ptit doet al hapete...
- Portant, i n' a nén l' air metchant
- Ci ptit doet la k' fwait des rizetes
- N' est ç' nén m' mame ki blague tot riyant
- Et ki m' raconte des colibetes ?
Hårdêye difoûtrinne
[candjî | candjî l’ côde wiki]
Li Wiccionaire si rsieve di sacwantès fråzes da Paul Depas po-z enimådjî des mots k' i gn a.
