Rimetaedje (croejhete)
El croejhete, li rmetaedje u comparaedje s' aplike ås addjectifs et ås adviebes.
On rmetant addjectif, on rmetant adviebe (courtinnmint, on rmetant), c' est èn addjectif ou adviebe ki mostere on rmetaedje (comparåjhon) di cwålité inte deus sudjets.
E walon, li rmetaedje si fwait pus rade avou des adviebes radjoutés divant l' addjectif ou l' adviebe. Mins gn a sacwants mots ki sont des miers djivions.
Dilé les rmetants, gn a les sorrimetants (addjectifs ou adviebes sorlatifs).
Rimetants ki sont des miers djivions
[candjî | candjî l’ côde wiki]- Si fré est meyeu k' leye e carcul.
- K' i fwait mannet, cial a Uke; ci n' est nén pé dins les corons d' ovrîs.
- Dji cnoxhe çoula mî k' lu.
- N' a nén pire sourdåd ki l' ci ki n' vout rén ôre.
Adviebes di rmetaedje
[candjî | candjî l’ côde wiki]On mostere li sudjet k' on rmete avou l' prumî, pal voye di l' aloyrece «ki».
- Il est pus grand k' mi.
- Dji so ossu malén k' twè.
- Vosse vea est totossu crås ki l' ci Matî Djigot.
- Nos n' esténs nén si biesses ki po nos leyî emantchî.
- Li pîce esteut moens gaiye k' on n' dijheut so l' afitche.
Dins des ôtes lingaedjes
[candjî | candjî l’ côde wiki]Dins les lingaedjes tîxhons, sacwants rmetants addjectifs (les cis ki mostrèt on pus hôt dgré) si fwaiynut pa acawtaedje. Adon, c' est des djivions a pårt.
- (inglès) :
- I was fast, but he was faster than I
- Il a stî pus rade ki mi
- (neyerlandès)
- Ik ben slim, maar ze is slimmer dan ik.
- Dji so sûti, mins elle est pus sûteye ki mi.
Hårdêye difoûtrinne
[candjî | candjî l’ côde wiki]- Sacwants ôtes egzimpes (dins l' Pitite croejhete Hendschel)
- (fr) Sacwants ôtes egzimpes (dins l' Grosse croejhete Hendschel)