Silocibe des flates

Èn årtike di Wikipedia.
des silocibes des flates

Li silocibe des flates, c' est on silocibe (ene sôre di ptit tchampion), ki vént voltî åtoû des flates di vatche, a l' erire-såjhon, el Walonreye et ôte pårt e l' Urope coûtchantrece.

Il a ene copowe pitite ronde grijhe tiesse, avou come come on ptit boursea al miercopete. I vént pa plake di trinte a céncwante åbussons.

Divins, gn a ene drouke ås forvuzions, li silocibene, del famile do LSD. C’ est Albert Hofmann, l’ askepieu des laboratweres Hofmann-Laroche, ki mostra çoula l’ prumî e 1962.

No e sincieus latén : Psilocybe semilanceata.

Plaeces k' il î crexhe[candjî | candjî l’ côde wiki]

El Walonreye, on l' trouve tot å long do waeyén-tins dins les waides k' on n' î mete pupont d' biesses. I vént dins les hoûssets, avou totès sôres di yebes rafiantes d' azote, a costé des flates di vatches, des strons di tchvå, des peteles di bedots. Mins i n' crexhe nén so les waides k' on-z î a semé ås ecråxhes tchimikes å bontins udonbén di l' esté.

I fåt co k' il î fwaiye crou et k' il î lujhe li solea assez.

I crexhe pus voltî so les surès teres.

Forvoeyants efets[candjî | candjî l’ côde wiki]

Les efets sont bråmint pus foirts avou des souwés tchampions k' avou des frisses. Les forvuzions arivèt åjheymint avou 10 setchis tchapeas, mins i ndè fåreut ene cwarantinne di frisses po-z aveur li minme efet.

L' efet dispind di l' estat del djin divant d' endè prinde. S' elle est tote seule dins on bwès, ele voerè purade des belès fleurs et des åbes ki s' kitoirdèt. Si li magneu d' droctant tchampion est avou des djins ki l' riwaitnut d' cresse, i va aveur l' epinse k' i gn a des moudreus (u des djindåres) kel shuvnut. Et cori evoye, u s' coûtchî al tere po s' rinde.

Les efets cminçnut après ene grosse dimeye eure, et durer 5 a 8 eures.

Hårdêye difoûtrinne[candjî | candjî l’ côde wiki]