Sinteze di pårlaedje
Li sinteze di pårlaedje[1] u produjhaedje di paroles[2], c' est ene tecnike di sûtisté éndjolike ki permete d' askepyî ene vwès uminne, ki lét on tecse sicrît dins on metou lingaedje.
Tecnike vijhene
[candjî | candjî l’ côde wiki]Li sinteze di pårlaedje est djusse li contråve do riscrijhaedje del vwès.
E walon
[candjî | candjî l’ côde wiki]Ene prumire saye di sinteze di cåzaedje a stî enondêye pa Lucyin Mahin, Flipe Boula, Pablo Sarachaga, Joselyne Mostenne et Marc Evrard e 2023. Il atakît avou èn eredjistrumint do roman «Li Ptit Prince» da Antoenne di Sint-Spuri léjhou avou on prononçaedje eterpayis a cmincî d' on ratournaedje e rfondou walon da Lorint Hendschel.
Ene prumire tecnike, c' esteut di rmete tot li scrît e l' alfabet fonetike sampa.
Mins, e 2024, avou l' aidance di Felipe Espinosa, i sayît les nouvès tecnikes lomêyes «neuronikes»[3], la ki l' sûtisté éndjolike boute cåzu leye tote seule. Li sistinme di sinteze esteut rashiou so l’ aprindaedje afrontiveus (VITS).
Vocial ene saye, pate a pate, a pårti del fåve «li bijhe et l' solea». Li tecse léjhou esteut scrît e rfondou, rortografyî a cmincî d' on scrît e sistinme Feller d' on prononçaedje coinrece di Transene (oyåve vaici). Vo l' cial:
Li bijhe et l’ solea estént ki s’ margayént po sawè kî çki, des deus, esteut l’ pus foirt.
Mins ç’ côp la, la k’ i veyèt on tchminåd k' arivéve pyim piam, dins on bea noû tchôd paltot. Ladsu, i s' metèt d' acoird po çci: li ci ki parvénreut l' prumî a lyi haper s' mantea, ça sreut lu ki sreut rwaitî come li pus foirt.
Adon, la k' li bijhe si mete a shofler tant k' ele pout. Mins non pus, pus çk' ele shofléve, pus çki l' roteu s' racafûléve dins s' grand paltot. Ça fwait k' elle a laixhî ouve.
A ç' moumint la, la ki l' solea s' mete a lure come cwand i lût des cwate costés. Et c' est ki: après ene hapêye, la ki l' pormoenneu a stî reschandi, et il a tiré s' mantea.
Ça fwait ki l' bijhe a bén dvou rconoxhe ki l' solea esteut l' pus foirt di zels deus.
Et voci sacwants sayes di sinteze:
-
Prumire saye (cåzaedje foirt kihatchî) (10 di may 2024)
-
Pareymint, rashiou so on ritche soûmint d' eredjistrumints (12 di djun 2024)
-
Ôte saye avou on flåwe soûmint d' eredjistrumints (25 di djun 2024)
-
saye avou on foirt flåwe soûmint d' eredjistrumints (19 di setimbe 2024)
Vocial deus sayes di lijhaedje del prumire fråze d' èn årtike do Wikipedia walon.
-
li dzeu di cisse pådje cial (26 d' awousse 2024)
-
li deujhinme guere des scoles (25 d' octôbe 2024)
Des sayes fourît fwaites tot asprovant sacwants modeles: (1) avou u sins cvierseu grafinme-foninme, eyet (2) e-n eployant u nén on modele neuronike k’ aveut stî etrinné pol francès.
Al difén, on dmanda a des waloncåzants di schoûter on ptit cint d’ eredjistrumints et d’ dire leu rsinta avou ene note di 1 a 5.
Les rzultats mostrèt ki l' sistinme pre-etrinné e francès n’ est meyeu ki po l’ flåwe soûmint d’ eredjistrumints (18 munutes).[4]
Hårdêyes difoûtrinnes
[candjî | candjî l’ côde wiki]- Tecse k' a siervou a l' prumire saye di sinteze di pårlaedje e walon
- (wa) & (fr) Pate a pate avou l' prumire saye di sinteze di pårlaedje e walon (so "Berdelaedjes")
- (en) Prezintaedje des prumirès sayes a l' UNESCO (24 & 25 di fevrî)
Sourdants
[candjî | candjî l’ côde wiki]- ↑ Ossu: sinteze di cåzaedje, di djåzaedje, di dvizaedje.
- ↑ eto: produjhaedje di dvize.
- ↑ (en) loukîz sol Wiki inglès
- ↑ (en) Philippe Boula de Mareüil, Text-to-speech synthesis in Walloon, an endogenous language of Belgium, raploû UNESCO Language technologies for all - Advancing Humanism through Language Technologies, Paris, 24 et 25 di fevrî 2025.