Stimbiè

Stimbiè (femrin Stembert, (de) Steinberg), c' est èn ancyin ptit ban del Walonreye, rebané avou Vervî, el province di Lidje.

eglijhe

Mwaissès dnêyes

• Limeros del posse 4801 (nén candjî):
• Limero diyalectolodjike: Ve 23.
• Arondixhmint: Vervî
• Lomaedje et spotaedje des djins did la:
  • Lomaedje: Stimburkin u Stimburtin, Stimburkinne u Stimburkinne; (F. Stembertois, oise)
  • Sipotaedje: les Leus.
• Sitindêye : 648 ectåres.
• Peuplåcion : 2037 (1831); 1325 (1965); 2668 (1900); 5101 (1930); 7825 (1976).

Djeyografeye

Metou so hintche erive del Vesse, k' el schåye d' Ådrimont, a Bijhe.

Il est vijhén avou Limbôr å Levant (li limotche, c' est l' Hodjori), avou Djalhé a Nonne, ey avou Heuzi å Coûtchant (inte les deus, gn a l' Mangonbroû.

Istwere

C' esteut aprume on hamtea d' Vervî, mins ki divna pårotche e 1591. I fourit leyî foû des meurs di recloyaedje del veye e 1651.

I divna dislaxhî d' Vervî li 25 di djanvî 1656, pa èn edit do prince-eveke di Lidje. I fjha pårteye do markizat d' Frantchimont.

Comene do Dipårtumint d' l' Aiwe d' Oûte tins do redjime francès.

E 1837, on lyi rsaetcha Heuzi, mågré les rclamaedje des Stimburkins.

Economeye

Gn av des menes di calamene disk' e 1840.

Tuzance walone

Scrijheus e walon

• oteur anonime del Paskeye do volant tchet d' Vervî
• Jean-Michel Pire î a vnou å monde.
• Gn aveut ene S.N.R. avou on no e walon «Lu novê Leûp», mins k' a staté e 2019. Il avént adjinçné ene waibe foirt bén documintêye.

Dins les belès-letes e walon

On cåze di Stimbiè, et d' ses nos d' plaece (e Brôde, e Crote, ås Sourdants) dins l' paskêye Li cinsî d' E Brôde et les ptits soteas sicrîte pa Jean-Guillaume Levaux.

Foclore

Li spot des Stimburkins (les Leus) provént d' ene racontroûle. On cinsî (Matî) aveut boerlé å leu, cwand il ourit sacwants poytreye di stronnêyes. On traca l' biesse, mins on n' touwa… k' on tchén.

Gn a ene rimimbrance di çoula. Tos ls ans, on broûle on leu d' papî sol «Grand Vivî».

Hårdêye difoûtrinne

Waibe del soce «Lu novê Leûp»