Yvette Juskowiak

Yvette Juskowiak, c' est ene sicrijheuse e walon ki note l' accint d' Djumet.

Elle a scrît eto e francès.

C' est eto ene djouweuse di teyåte avou l' dramatike «Èchène».

Egzimpe di boket

Ridea

Les djins ont-st aresté d' clatchî dins leu mwin.

El ridea s' a baxhî;

Les loumires ki m' asblawixhént

Sont distindowes.

Les djins evont viè leu måjhone

Dins l' zûnaedje

Des chuchlotaedjes,

Ureus d' awè oubén brai

On tot ptit côp.

Dins m' lodje,

Les atricayes ki m' fijhént glati come on piele

Tcheynut

Ene après l' ôte.

Mi bele blanke cote pindowe al wesse, sokeye

Et dji rmete a m' dos mes gobeyes

Di tos les djoûs;

Et, tot stierdant m' grimaedje,

Dji ravike co sacwants munutes

Dins m' persounaedje

Sol tins k' les comedyins

Berdelnut astok di mi.

El meteu el sinne est binåjhe;

L' oteur nos rabresse tchaeke a s' toû.

Mwints côps, des bresses tcherdjîs d' on bouket d' fleur

Nos vegnnut bistoker.

Padvant l' ouxh, gn a des djins ki ratindnut;

Sacwants vizaedjes k' on n' conoxhe nén

Ki soriynut.

C' est l' dierinne imådje k' on tchereye dins s' cour.

Divant d' endaler påjhirmint

Si neyî, mierseu, tot mierseu,

Dins l' noere nute.