Categoreye:Medcene

Èn årtike di Wikipedia.

Foû di l’ orobète (lîve di sorcî) d’ on mounî, vocichal, avou lès dinrêyes ki passenut pau MOLIN, cki faut po sognî lès :

Coûts d’ alinne : Fé boûre èt l’ bwâre di l’ eûwe avou do laton èt do suc di candi.

Brûlûres : sipaude dissus dèl blanke farène

Colikes/maus d’ vinte : mète dissus, on ptit satch d’ awinne o d’ bén tot tchaud laton.

Èdjalûres : lès froter tos lès djoûs d’ grinnes di lin ; î mète dès fouyes di wassin cûtes dins do sawin o do bûre sins pont d’ sé ; mète dès sipiyîyes fouyes di r’gon ; dès grins d’ awinne dins do crau laurd, i mète li feû, rascoude li nwâre crauche èt froter l’ èdjalûre.

Rôze (èrèsipèle) : papin d’ farène di wassin èt vinêgue ; dès scwaches di sau dins dèle blanke farène maxhîye avou do cognac.

Twèrtchidaedje : trimpaedje li pus lontins possibe dins do bigaud, do purin.

Djanisse : té d’ wadje.

Mau d’dints : ène vôte di farène d’ wadje dissus s’ massale ; on papin d’ laton d’ wassin avou do vinêgue. Po n’ pont è nn’ awè, n’ nén magnî d’ pwin, d’ farène, li djoû dèl Sint Ubèr.

Mau d’ gwadje : papin d’ mièl, di pwin èt d’ racène ; d’ sau, pwin èt vinêgue ; farène di lin maxhîye avou dèl mostaude.

Sape, rênète (muguet) : froter l’ gwadje di l’ èfant avou ène taye di pwin èt l’ doner au prumî tchén ko passe.

Orioule, orion, orlue, florete, kike (orgelet) : papin d’ pwin di rigon trimpé dins do lacia, dèl farène di lin.

Blanc dwèt (panaris) : papins : d’ farène di lin, d’ mièl, d’ alun, d’ ôle d’ olîve èt d’ on oû ; pwin, lacia èt blanc savon ; farène di wassin èt grinne di lin ; farène di lin èt r’gon ; d’ lîve (on l’ pout èto sititchî dins l’ dwèt, k’ on côpe !)

Rumatisses : après l’ fornêye do pwin, muxhî dins l’ for, lès pîds dvant, tot lèyant s’ tièsse foû. Li for dwèt co ièsse li pus tchaud possibe. Po n’ pont è nn’ awé, waurder on maron è s’ potche.

Suwêes : s’ rilaver lès pîds, lès mwins, dins d’ l’ euwe di laton.

Frèds d’ cervia, catares : peneter dèl poûde di maron.