Må d' araedje
Li må d' araedje (on dit eto: li raedje u l' araedje), c' est on må ki s' prind, ki pout ataker totes les biesses a tchôd sonk, et les djins avou, ki l' cåze c' est on virûsse ki distrût li cervea.
Li må d' araedje est cåzé pa on virûsse.
Ådvins |
[candjî] Senes do må d' araedje
[candjî] Ås djins
Les djins ont peu d' l' aiwe. Si on lzî tape on seyea d' aiwe sor zels, i polèt mori sol côp. I mourront pår troes a cwate djoûs après les prumîs senes del maladeye.
[candjî] Ås vatches
Li vatche k' a l' må d' araedje boerlêye tofer, et gleter, et cabalancî do drî. Cwand on lyi mostere on tchén, ele bôre dissu. Padecôps ele presse. Après on djoû u deus, ele tome djus, sins s' poleur rilever. Ele creve divant 6 djoûs, a pårti do prumî sene. [1]
-
Eraedjeye vatche ki boerlêye
-
Li minme eraedjeye vatche ki bôre so on tchén
-
Boerlaedje
[candjî] Ås berbis
Cwand èn araedjî tchén atake on tropea d' berbis, i ndè va dandjreus hagnî dipus d' ene. Dabôrd, les senes clinikes vont aparexhe so sacwantès biesses. Gn årè do tchôcaedje å meur, on drole di rwaita, do toumaedje djus. Tot voeyant on tchén, ele pout l' ataker, et dmorer stampêye djusse divant lu. Mins cisse kidujhance la egzistêye ossu bén avou des berbis nén malådes. [2]
-
Ene berbis djus do må d' araedje, ene pate sitindow padvant leye
-
Tchôcaedje å meur
[candjî] Ås tchéns
Èn araedjî tchén serè prezinté aprume a l' årtisse pask' i n' sait pus avaler. Mins c' et todi foirt riskeus d' aler rwaitî dins s' boke, ca, a ç' moumint la, li gletaedje pout dedja esse rascråwant po les djins.
[candjî] Espaitchance
[candjî] Lûte siconte des rnåds
El Walonreye, on-z a gåzé les terêyes di rnåds e 1968. On waitive di trover tos les trôs d' rexhowe, pwis on les ristopéve, soeye-t i avou ene grosse pire, soeye-t i avou del tere et des waezons. Après ça, on stritchive li gåz på dierin trô po-z esse seur di stofer tot çki vikéve didins. Mins on touwéve dipus d' taessons ki di rnåds, ca les rnåds avént skifté evoye.
[candjî] Lûte siconte des tchéns
E Rwanda, on schavéve des grandès fosses, et-z î tchessî les tchéns k' î crevént. [3]
El Walonreye, divinltins, on fjheut parey et tchessî les tchéns dins des fondreyes, come li fondreye ås tchéns di Nîme, k' end a wårdé l' no.
[candjî] El Walonreye
[candjî] Li må d' araedje et l' istwere di sint Houbert et do Bork
Sint Houbert, ki s' coir a stî amoenné å Bork, e 874, on-z a volou k' i médyîxhe li må d' araedje. Eto, des pelrins di l' Urope etire fijhént li perlinaedje a Sint Houbert d' Årdene.
[candjî] e 20inme sieke
Li minêye di må d' araedje k' a cmincî diviè 1965 el Walonreye esteut apoirtêye pa les rnåds, et aveut pårti d' Pologne.
Ele n' a måy passé Mouze.
On-z a cmincî a mete les plokes ås rnåds conte l' araedje diviè 1975.
[candjî] Li må d' araedje dins l' lingaedje walon
- Loukîz pår dins li splitchant motî.
[candjî] Les ratourneures
Va s' prinde li må d' araedje: Va-st å diale.
[candjî] Les stindaedjes di sinse
ene araedje, c' est eto on disdut avou ttafwait cou dzeu cou dzo, avou bråmint do brut. Kéne araedje al såle, cwand ont cmincî a s' margayî.
[candjî] Askepiaedje di noveas mots
L'adjectivire k' araedje a radmint volou dire "bråmint". Elle a stî télmint eployeye k' ele s' a etroclé, et divni l' adviebe carape, pu si parint carapmint.
[candjî] Sourdants & pî-notes
- ↑ MAHIN, L., CHADLI, M., LAMRAOUI, M. (1984/1985). La rage bovine: aspects cliniques à travers une série de neuf cas et éléments du diagnostic différentiel. Maghreb vétérinaire, 1 (6), 23-28..
- ↑ MAHIN, L. (1984).Observations d'un foyer de rage ovine: aspects cliniques et éléments de diagnostic différentiel. Maghreb vétérinaire, 1 , (5), 15-19.
- ↑ Omer Marchal, conferince sol Rwanda, Transene, 1984.
