Trinité (atuze)

Èn årtike di Wikipedia.
Loukîz cial li pådje d' omonimeye

Po les crustins, li Trinité (on dit eto : li mistere del Sinte Trinité, li Trinisté, li Sinte Troejhinne), c' est ene sinte creyance (dogue), ki vout ki l' Bon Diu soeye fwait di troes "persounes" : Diu l' Pere, Diu l' fi (Djezus-Cri), et l' Sint Esprit.

L' atuze a stî diswalpêye pa l' Eglijhe diviè l' 4inme sieke.

Alez s' vey e splitchant motî po des linwincieusès racsegnes so les mots "Trinité" et "troejhinne".

Aspoyas di l' atuze del trinité dins les sints lives[candjî | candjî l’ côde wiki]

Sacwants passaedjes des sints lives polèt esse ratuzés come des sene di l' atuze del Trinité.

El Djeneze[candjî | candjî l’ côde wiki]

Li prumî verset del Bibe :

Å cmince, li Bon Diu fjha l' Daegne eyet l' Cir

Mins en ebreu, Elohim – li Bon Diu – est å pluriyal, et bara – « fijha » – est å singulî, çou ki pout esse comprins come cwè li Bon Diu est troes et onk.

Des versets la kel Bon Diu cåze å pluriyal.

Li Bon Diu derit: Fijhans les djins a noste imådje, por zels nos ravizer. (Djn 1:26).
Vola k' l' ome a divnou come onk di nozôtes. (Djn 3:22)

Pus tård, a Babel, li Bon Diu derit:

Abeye, dischindans radmint po formaxhî leu lingaedje! (Djn 11:9).

Cwand l' Bon Diu aparexha a Abråm, i s' mostra come troes djins.

Dins l' Noû Testamint[candjî | candjî l’ côde wiki]

Å Bateme, li Fi esteut e l' aiwe, li Pere cåzéve do cir, et l' Sint Spér dischindeut doucetmint come on colon. Djezus-Cri nos a leyî l' rîle do bateme crustin, avou l' parole:

Alez si acsegnîz l' monde etir, et batijhî å no do Pere et de Fi et de Sint Spér. (Matî 28:19).

Sint På djåze del Sinte Trinité eto.

Li gråce di nosse Signeur Djezus-Cri, et l' tcharité do Bon Diu [li Pere] et l' pårtixhaedje do Sint Spér fouxhnuxhe avou vozôtes. (2 Cor 13:13).
I gn a bråmint des bistokes, mins c' est l' minme Sint Spér; i gn a bråmint des siervices, mins c'est l' minme Signeur [Djezus]; i gn a bråmint des ovraedjes, mins c' est l' Bon Diu k' overe totafwait ådvins d' tertos. (1 Cor 12:4-6).
På Crisse, nos avans tertos les ouxhs å lådje po moussî å Pere dins li Sint Spér. (Ef 2:18).[1]

Vicansté di l' atuze del Trinité dins l' acsegnmint rlidjeus el Walonreye[candjî | candjî l’ côde wiki]

L' atuze del Trinité n' est pus voltî acsegneye ås catruceme el Walonreye e 2008.[2]

L' atuze del Trinité veyowe des ôtès rlidjons monoteyisses[candjî | candjî l’ côde wiki]

Les djwifs, come les muzulmans sont foirt disconte del creyance al Trinité, pask' i trouvnut ki ça n' va waire avou l' monoteyisse. Les cis ki croeynut al Trinité sont lomés des muzulmans les "moucharikîn", "les cis k' assoçnèt Diu".

Po les muzulmans, li sourate 126 di l' Alcoran est waiteye come li passaedje ki rfuze li Trinité, copurade ki Djezus-Cri soeye li fi da Diu l' Pere :

1. Dijhoz k' i gn a k' on Bon Diu
2. Et k' il est la dispu todi et po todi;
3. I n' a pont d' efants, i n' a ni pa ni mame,
4. Et i n' a nou parint, minme did lon.

Alére[candjî | candjî l’ côde wiki]

Sourdants[candjî | candjî l’ côde wiki]

  1. G. Sfasie, The Holy Ghost ou l' Sint Spér et trime et trame sol Trinité, tecse complet so l' Aberteke.
  2. Dins ene inkete dilé des catrucimîs del Walonreye e 2008, Djôr Sfasie trouve les responses ki shuvèt al kesse : «C' est cwè, por vos, li Sinte Trinité ?» : (1) li sour dal Sinte Viedje; (2) li raploû da Djezus, Mareye et Djôzef, li Sinte Famile, cwè; (3) ene båshele k’ esteut l’ mwaisse persounaedje di leu catruceme del anêye di dvant. (Li Rantoele (gazete) l° 46, esté 2008).