Armand Boileau

Armand Boileau skepia l' 13 d' octôbe 1916 a Ougrêye et mora l' 27 di fevrî 2004 a Lidje.

C' esteut on sincieus k' a bråmint rcwerou so les nos d' plaeces des viyaedjes a tchvå sol walon et l' tîxhon, inte di zels a Moulan, Åbe, Hinri-Tchapele, Bailou et Membak.

Di s' mestî, esteut prof di neyerlandès et assistant a l' univiersité.

C' est e 1934 k' i cmince ses studiaedjes a l' univiersité d' Lidje, e filolodjeye tîxhone; e prumire licince, i va studyî sacwants moes ezès Bas-Payis, a l' univiersité d' Groningen, et, tot rivnant a Lidje, va shuve les cours di diyalectolodjeye walone dinés pa Jean Haust; c' est adon k' i va fé si teze di licince so les mots d' walon lidjwès ki vnèt do tîxhon. E 1946, i rçût eto l' Pris Vercoullie di filolodjeye neyerlandesse del pårt del Flaminde Royåle Academêye di Lingaedje et Letes (Koninklijke Vlaamse Academie voor Taal-en-letterkunde).

Avou s' diplome i va dner cours di neyerlandès et d' almand, å Royå Atenêye di Tcheslet (1938-1940), poy å ci di Tchinnêye disk' e 1968. Di 1961 a 1965 i va eto dner des cours di neyerlandès a l' univiersité d' Lidje et publiyî sacwants ovraedjes sincieus so l' acsegnmint des lingaedjes e scole. Eyet e 1971 esse lomé professeu a l' univiesité, disk' a s' pinsion e 1983.

Costé diyalectolodjeye walon i n' si va nén arester nerén, la k' e 1942 i va scrire èn årtike pol bultén do diccionaire walon, eyet ataker on grand rcweraedje dins l' redjon del province di Lidje a tchvå sol walon et l' tîxhon, po-z aveur les nos d' plaece dins l' lingaedje do payis, ey eto les lomadjes walons des plaeces tîxhones, si rcweraedje va esse eplaidî e deus tomes, e 1957 et 1971, di cåzu 500 pådjes tchaeke. Boileau esteut eto mimbe del SLLW dispoy 1952, et minme esse sicretaire di 1959 a 1962.

Come grand cnoxheu del toponimeye tîxhone-romane, il aveut divnou corespondant e 1960 del Comission royåle di Toponimeye eyet Diyalectolodjeye, sicretaire del seccion walone di 1961 a 1965, eyet co sicretaire djenerå di 1969 a 1982, et responsåve des eplaidaedjes di 1969 a 1983.

Sincieus eplaidaedjes da Armand Boileau.

• Systematisch onderzoek van de woorden van germaansche oorsprong in het Luiker waalsch (1938).
• Classification chronologique des emprunts germaniques en wallon liégeois (divins Bulletin du Dictionnaire wallon, 1942).
• Enquête dialectale sur la toponymie germanique du nord-est de la province de Liège. (tome I 1957, tome II 1971; livreye P. Gauthier, Lidje).

Alére

• rivuwe "Walones", 2/2004, 5-8.