Djudi

Èn årtike di Wikipedia.

Po des linwincieusès racsegnes sol mot "djudi", alez s' vey sol Wiccionaire

Li djudi (ou diyou), c' est l' no do cwatrinme djoû del samwinne, li cénkinme po les Djwifs et ls Arabes.

Li fôme diyou egzistêve co coranmint divant les anêyes 1900 et des dins des plaeces k' i gn a; mins c' est l' fôme avou aplacaedje tîxhon k' est ouy li pus corante. Li mot vént do latén jovis dies ki vout dire "li djoû da Djupiter" (li diu romin oudonbén l' planete).

Ezès tîxhons lingaedjes li djoû est purade lomé "djoû da Thor" (k' est li diu dins l' mitolodjeye tîxhone ki corespond a Djupiter po les romins). E djaponès on l' lome "djoû do bwès" (木曜日, mokuyōbi), mins ci bwès la pout esse veyou soeye-t i come onk des cénk elemints prumioûles des Chinwès (li feu, l' aiwe, li bwès, li metå eyet l' tere) ou come l' acourtixha do no del planete Djupiter (木星, mokusei), dj' ô bén, ki l' djoû est lomé come amon nozôtes. E chinwès c' est tot simplumint li "cwatrinme djoû del samwinne" (星期四 u 週四); ey e portuguès li "cénkinme" (quinta feria).

Li nôme ISO 8601 definixh li djudi come li mitan del samwinne. Les djudis d' ene anêye determinèt l' limerotaedje des samwinnes. Li samwinne 1 est l' prumire k' a-st on djudi.