Vénrdi

Li vénrdi (ou divénr), c' est l' no do cénkinme djoû del samwinne, li shijhinme po les Djwifs et ls Arabes.

Dinêyes etmolodjikes et dujhances totavå

Li fôme divénr egzistéve co coranmint divant les anêyes 1900 et a des plaeces k' i gn a; mins c' est l' fôme avou aplacaedje tîxhon (vénrdi) k' est ouy li pus corante. Li mot vént do latén veneris dies ki vout dire "li djoû da Venusse" (li deyesse rominne ou l' planete).

Ezès tîxhons lingaedjes li djoû est purade lomé "djoû da Freya/Freyr" (k' est, dins l' mitolodjeye tîxhone, li deyesse ki corespond a Venusse po les Romins). E djaponès on l' lome "djoû do metå" (金曜日, kinyōbi), mins ci metå la pout esse veyou soeye-t i come onk des cénk elemints prumioûles des Chinwès (li feu, l' aiwe, li bwès, li metå eyet l' tere) ou come l' acourtixha do no del planete Venusse (金星, kinsei), dj' ô bén, ki l' djoû est lomé come amon nozôtes. E chinwès c' est tot simplumint li "cénkinme djoû del samwinne" (星期五 u 週五); ey e portuguès li "shijhinme" (sexta feria).

Po les moslimîs c' est l' djoû k' on va priyî al moskêye. C' est djoû d' condjî dins sacwants payis arabes (Aldjereye), mins nén dins ds ôtes (Marok, Tunizeye).

---

• Les ôtes djoûs del samwinne: londi ~ mårdi ~ mierkidi ~ djudi ~ vénrdi ~ semdi ~ dimegne
• Les intrêyes po vénrdi et divénr dins l' esplicant motî.
• Les moumints del djournêye.