Les nutes di måle lune (plakes di muzike)

Èn årtike di Wikipedia.

Les nutes di måle lune, c' est l' tite d' ene boessete avou deus stroetès plakes des Droles di Lodjeus k' a vudî e 2016.

Sourdant des tchansons[candjî | candjî l’ côde wiki]

Li cåzaedjisse et compôzeu di bråmint des tchansons, c’ est Djhan-Pire Vervî.

Mins gn a eto des airs rifwaits so des scrijhaedjes di mwaisses powetes walons, Louis Lagauche (deus côps) eyet Joseph Duysenx. Ci-cial clôt l’ schôtlêye avou ene tchanson d’ sôlêye, nén pikêye des viers, xhinant ene rilomêye compôzucion francesse « Sur le seuil de ta porte ».

Les tchansons[candjî | candjî l’ côde wiki]

N a deus côps onze tchansons, 21 noveles ey ene riprinjhe (« L’ andje ki pindeut l’ aiye »).

Li prumire tchanson rind bon dvwer å teyåte e walon. Li tite, c' est « Li vî teyåte ». Li tchanson est etcherpeté avou les tites di totes sôres di pîces k’ ont stî djouwêyes å Triyanon d' Lidje. A ricnoxhe tola:

Tinmes[candjî | candjî l’ côde wiki]

Amour[candjî | candjî l’ côde wiki]

L’ amour rivént sovint, come di djusse. Dins « Ele » (ene tchanson ki rvént deus côps, li deujhinme a môde « bossa nova »), c’ est ene djonne feye ki n’ pinse måy å leddimwin:

elle est come li toûne-å-vint
I n’ a rén k’ el ratind
Si veye, c’ est l’ candjmint
Ele ni tuze nén a dmwin
Ele dit k’ ele n’ a nén l’ tins
C’ est co si lon, dimwin

Ele mete ses lepes so les cenes d’ onk ki « djåze di davance » et rire di ses sovnances.

Pu gn a l' paskeye di ci vî hanteu d’ tertotes, mins nén foirt amiståve avou les cmeres:

Les femes ont troes toûs dpus ki l’ Diåle
Avou l’ ådje, ele divnèt des macrales.
S’ ele dijhèt l’ vraiy, elzî tome on dint
Les femes ont vormint tos les ehins.

Tot å rvier, n a l’ ci ki n' nd a hanté nole, et k’ a atchté ene pope di cawoutchou (di resconte) po « fé des timpesses å mitan des linçous ». Disk’ å djoû ki... i trawe li pope d' on tchén d' cigarete nén distindowe.

Ôtes tinmes[candjî | candjî l’ côde wiki]

Djan-Pire n’ est nén tchitche di tinmes. On va trover des tchansons:

  • sol drouctaedje (« Bouneur di Flamind »)
  • sol tuzinaedje so deus côps rén (« Tot m’ ewaere »)
  • sol roviance d’ Alzemer (« Po Elsa »)
  • sol viyesse, k’ arive si raddimint (« Tuzaedjes »)
  • sol ritchesse k’ amoenne toplin des fås copleus (« Les potches vudes »)
  • so on vî «hait-l'-djin», haeyåve et vergogneus (« Å monde conte cour »).

Li tchanson k’ a dné l’ tite å scrinea, c’ est « Li måle lune », la k’ on mousse e-n on monde di macrales et d’ grimancyins.

Minme airance dins « Plaijhante famile » (do Lagauche), wice ki l’ tchanteu vout hanter avou ene feye ki ses parints et atnants fijhèt åtoû des moirts.

Tchansons ås beas mots[candjî | candjî l’ côde wiki]

Dedja dins ene ôte plake, Vervî aveut trossî ene tchanson avou des toitche-linwe. Cial, vo-z endè la ene avou tos rmetaedjes a biesses (« biesse di tchanson »), ki n’ est nén ene biesse tchanson.[1]

Efets foû tchanson[candjî | candjî l’ côde wiki]

Dins deus cas, on ôt ene langue etrindjire, ki c' est do malgache, dit på guitårisse del binde, Paul Talbot.

N a co l' vwès da Françwès Duizink, ki dit do Maquet.

Gn a ossu l' cene dal tchanteuse des Droles di Lodjeus, Gilberte Matina, ki dit ene ricete di macrale.

Tchantaedje[candjî | candjî l’ côde wiki]

Ci côp cial, c’ est Jean-Pierre Darras ki tchante tote les tchansons. Gilberte Matina etervént dins deus tchansons « tchanson po Jean-Pierre » et « les potches vudes » (vwès padrî).[2]

Sourdants[candjî | candjî l’ côde wiki]

  1. Mahin Lucien, Ene dobe sitroete plake e walon; Li Rantoele 78 (esté 2016).
  2. Gilberte Matina, letes di cibernaivieus Li Rantoele 79, erî-såjhon 2016.