Prezintoe d' apårtinance

On prezintoe d' apårtinance, c' est on prezintoe ki mostere l' apårtinance do sustantif kel shût.

Acoird

E walon, li prezintoe d' apårtinance s' acoirdêye avou l' sustantif ki shût, et nén avou l' possedeu (come dins les lingaedjes tîxhons u semitikes).

Avou ça k' i gn a pont d' diferince inte les prezintoe d' apårtinance omrins et femrins.

Inte deus cossounes

Inte deus cossounes, udon a l' atake (d' ene fråze, d' ene fråzlete u après ene pitite ahote cwand on djåze douçmint) et dvant ene cossoune, les prezintoes d' apårtinance do rfondou walon sont come dins l' tåvlea shuvant:

Djin	Prezintoe singulî	Prezintoe pluriyal
Cåzant(e) (1sg)	mi / èm	mes
Atôtchî (-eye) ordinaire et poli (-eye)	vosse / vo	vos
Atouwé	ti / èt	tes
Riwaitant(e)	si / ès	ses
Cåzant(e)s	nosse / no	nos
Atôtchîs (-eyes)	vosse / vo	vos
Riwaitant(e)s	leu	leus

Beloyance

Divant ene voyale, les prezintoe d' apårtinance vont mostrer des candjmints po-z apliker les rîles del beloyance (aprume po s' houwer des ahikets).

Egzimpes: Po l' cåzant (prumire djin do singulî)

«mi ome» si pout scrire insi, mins s' prononçrè /mi.‿jɔm/; i pout ossu prinde li lete di beloyance -n: «mi-n ome»

Avou ene divanceye voyale (Coûtchant walon), c' est todi avou cisse lete di beloyance la: «èm-n ome».

Pol deujhinme djin camaerådrece, c' est Piron parey: «ti ome» (/ti.‿jɔm/), «ti-n ome», «èt-n ome».

Po l' riwaitant (troejhinme djin do singulî), on pout ossu awè li lete di beloyance -t: «si ome» (/si.‿jɔm/), «si-n ome», «si-t ome» «ès-n ome».

Po les cåzants (prumire djin do pluriyal), les atôtchîs (et l' atôtchî poli et ordinaire), li prezintoe d' apårtinance aclape li lete di beloyance -t (mins nén si c' est -n): «nost ome», «no-n ome» / «vost ome», «vo-n ome».

Po les rwaitants (troejhinme djin do pluriyal), on sieve les letes letes di beloyance -z u -n: «leu-z ome», «leu-n ome».