Wikipedia:Inte di nozôtes/Bouter pol walon foû do Wikipedia

So ç' pådje ci, nos avans rmetou tot çk' ene sakî pout fé po-z aidî a schaper l' walon lingaedje, houte di rbouter sol eciclopedeye.

Scolaedje

Si vos cåzez bén l' walon, li pus impôrtante afwaire ki vos ploz fé, c' est d' sicoler des djonnès djins.

• Vos ploz rdjonde li CRIWE u l' CHADWE po bouter avou zels.
• Vos ploz dmander a rdjonde li programe pol walon e scole do Siervice des Lingaedjes do Payis.

Bouter so l' Etrernete

•  Vos ploz bouter so les deus ôtes pordjets Wikimedia e walon :
  • Wiccionaire
  • Wikisourd (on pout bouter so ç' pordjet la minme si on n' sicrît nén bén l' walon ; i gn a k' a rmete des bokets d' tecse come i sont dins des vîs lives)
• Vos ploz eredjistrer des mots e walon sol pordjet Lingua Libre.
• S' i gn a nén co d' modêye po vosse viyaedje, vos ploz eredjistrer l' fåve del bijhe et do solea pol Djåzant atlasse éndjolike des lingaedjes di France et d' pattavå.
• Si vos cnoxhoz des viyès tchansons u des rime-rame d' efant e walon, vos ploz les eredjistrer et ls evoyî ås djins ki boutnut sol Pordjet Melchior.
• Si vos cnoxhoz on live e walon ki n' est nén co sol waibe Objectif plumes, vos ploz evoyî des racsegnes po k' on l' î mete. Vos ploz eto leyî des comintåres so les pådjes des lives ki vs avoz inmé.
• Vos ploz rmete e walon des ptits lives d' imådjes dizo libe licince (come les cias k' fwait Odysseus).

Ridjonde li poûssance des djins ki disfindnut l' walon

• Si vosse comene n' a nén co rçu l' label Nosse comene dit OYI, vos e ploz cåzer a vosse mayeur u ås scabéns (et, si vosse comene l' a ddja rçu, vos ploz aveuri k' ele fwait bén tot ç' k' ele doet).
• Vos ploz todi scrire å deputé d' vosse redjon po lyi dire di dmander ene kession pårlumintaire sol walon.
• Vos ploz dmander å bibiotekî u al bibiotecresse di vosse comene d' atchter des lives e walon.

Ecwårlaedje

• Vos ploz dner sacwants cwårs ås soces ki disfindnut l' walon lingaedje ubén prinde èn abounmint a leus gazetes e walon po les sotni (les gazetes e walon ont sovint èn abounmint speciå po ls aspaleus). I gn a eto des soces come li SLLW k' on-z e pout divni mimbe sins dmorer dins ene coine a pårt del Walonreye et sins cåzer l' minme lingaedje ki tos ls ôtès mimbes.
• Vos ploz sotni les scrijheus et ls eplaideus tot atchtant les noveas lives e walons (les dierins lives k' ont rexhou sont todi rmetous so les pådjes ki cåznut des dierinnès anêyes).