Louis Lecomte
Louis Lecomte, c' est on scrijheu e walon k' a skepyî a Cargnon e 1900 et k' a morou a Mont-so-Mårciene e 1971. I dmoréve a Tcheslinea.[1]
Mwaissès dnêyes
[candjî | candjî l’ côde wiki]Il a cmincî a scrire e walon diviè 1920 et s' a djoké e 1943.
Après aveur djouwé teyåte, i scrît lu-minme sacwants pîces; adon-pwis, des tchansons e walon (tchantêyes pa Raoul Dewigne), ene ramexhnêye d' arimés et cwate schorsêyes di noveles.
Come romantî, c' est onk des meyeus scrijheus des belès-letes e walon.[2]
Marcel Fabry, l' adroveu di «Ramadjes», li rwaite come on scrijheu impressionisse.
Si feye Marcelle Lecomte a eto scrît e walon.
Sacwants d' ses ouves
[candjî | candjî l’ côde wiki]- Noere bijhe (noveles, 1936)
- Betcheyes (ramexhnêye d' arimés, 1940)
- Dédé (novele, 1941)
- Ramadjes (2 noveles, "Patachon" et "Ramadjes", 1942)
- Prumî bidon (novele, 1943)
Sipepieuse biyografeye
[candjî | candjî l’ côde wiki]I crexhe dins l' payis d' Tchålerwè, wice k' i boute come electrizyin.
E 1939, dandjreus k' i saya di fé måluzance di lu. Il schapa, mins è dmorer aveule. C' est çou k' i raconte — sins dire ki c' est lu — dins "Ramadjes", scrît e moes d' nôvimbe 1939.
Après l' guere di 40, il ala dmorer a Brussele, et s' î astaler come comierçant. Adon, i va scrire des tchansons e francès, dizo l' no d' pene di "Louis Gall". Il a bén toirtchî 120 tchansons po ls efants et 250 po les grandès djins. Ses compôzeus fourît Octave Grillard et Joseph Bachy. Ses tecses ont stî tchantés pa Georgette Plana et Rose Avril.[3]
Hårdêyes difoûtrinnes
[candjî | candjî l’ côde wiki]- Patachon e rfondou (so l' Aberteke)
- Mwaisse modêye (sol waibe "Li walon d' emon nozôtes")
Sourdants
[candjî | candjî l’ côde wiki]- ↑ si on croet Maurice Piron k' el lome (e francès) «li scrijheu aveule di Tcheslinea» dins La Vie wallonne l° 239, 3/1947, p. 224.
- ↑ M. Piron Anthologie de la littérature wallonne, p. 487
- ↑ Robert Wangermée & Pascale Vandervelen, Dictionnaire de la chanson en Wallonie et à Bruxelles