Coutcouloudjoû (gazete)

Èn årtike di Wikipedia.
Li cok do Cout´

Coutcouloudjoû (k' on rascourtixheut voltî insi: li Cout´), c' esteut ene pitite gazete tot e walon k' a rexhou inte 1996 eyet 2009. Li dierin limero, ci fourit li 149.

Discrijhaedje[candjî | candjî l’ côde wiki]

Al fén, ele moussive foû tos les troes moes. Divant, ele rexheut foû tos les moes, pu tos les deus moes.

Coutcouloudjoû c' est l' mot-brut do cok e walon, et ç' a stî rprins come tite del gazete del Soce des Rcåzeus d' Walon, metowe so pî pa Lucyin Mahin e 1996 a Transene, et k' a fwait dijh ans å lon ses raploûs a Bietris, poy a Bive.

Bén kel gazete seuxhe ricnoxhowe pal Cominålté Walonreye-Brussele, ki lyi alowe kékès çanses tos ls ans, li Cout' a todi dmoré indepindant et foû del politike.

Si mwaisse såme, c' est di spåde li walon et mostrer åzès djins ki c' est on vicant lingaedje, ki pout cåzer di ttafwait, et di bouter po dner å walon, avou l' gåmès et l' picård dins leus cwéns, li plaece ki lzî rvént el Walonreye.

Li Cout´, come on dit, est scrît tot e walon, e wårdant l' manire di scrire et les abitudes di tchaeconk.

C' est ene gazete sins mirlifitche, ki rexhe so cogne A6 (ene dimeye pådje A4). Elle est imprimêye pa fotocopiaedje, et raloyeye d' ene agrape å mitan. Li emantchaedje eyet l' fotocompôzaedje sont fwaits pa Pire Otjacques eyet Louwis Baidjot. C' est l' Louwis ki monte li gazete, eyet l' evoyî. Li Cout´ est saetchî a 150 egzimplaires.

Tecses eplaidîs dins l' Cout´[candjî | candjî l’ côde wiki]

Å rvier di bråmint des rvuwes e walon, Coutcoulondjoû eplaide totès sôres di tecses, ossu bén les belès letes ki del prôze nén racontrece. Mins gn a bråmint dipus d' prôze ki d' powezeye (li contråve di des rvuwes come "El Bourdon" u "La Wallonne", metans.

Dins les scrijhaedjes a môde di gazete, on cåze ostant d' actouwalité, flåwes ki di syince u d' foclore u d' istwere

Dins les belès letes, gn a des ledjindes, des contes, et, come di djusse, sacwants powinmes.

Gn a ossu, di tinzintins, des tecses rilidjeus, come des priyires.

Tenawete, gn a do diccionairaedje, des spots, des lçon d' croejhete walone.

Gn a eto ene coirnêye avou les noveles, aprume les teyåtes el Province do Lussimbork, les lives e walon, et on prezintaedje e walon di kékes ôtes gazetes e walon.

Sacwants grands scrijheus do Cout´[candjî | candjî l’ côde wiki]

Istwere del gazete[candjî | candjî l’ côde wiki]

Li l° 1, c' est 4 pådjes A4, ki rprindèt des tecses et des sayes da Lucyin Mahin, emey zeles, pol Rantoele. I mousse foû e moes d' awousse 1995. L' ekipe di redaccion, Pierre Otjacques et Louis Baijot, est ddja la. On-z anonce li prumî raploû del Soce des rcåzeus d' walon a Bietris, ki serè li screne del rivuwe.

Shuvance[candjî | candjî l’ côde wiki]

Les tecses eplaidîs dins l' Cout′ l' estént avou l' åjhmince di poleur esse replaidîs pa tolminme ké lijheu. Eto fourît i rmetous sol Wikisourd dizo l' licince di libe replaidaedje CC BY-SA 4.0.

Difoûtrinnes hårdêyes[candjî | candjî l’ côde wiki]