Soce des rcåzeus d' Årdene nonnrece

Raploû-pormoennåde a Botôssåt

Michel Francard ki dvize avou Henri Lepage, a ene seyance inte des studiants do Noû-Lovén et l' soce des rcåzeus a Bietris, e 2000

Li Soce des rcåzeus d' Årdene nonnrece, c' est ene copinreye e walon k' a stî metowe e-n alaedje a Transene e 1995 pa Lucyin Mahin, avou l' aidance da Pierre Otjacques, Yves Gourdin et Louis Baijot.

Ele s' a raploû a l' aisse del Tuzance di Bietris di 1995 a 2002, adonpwis å Cinte culturel di Bive. Ele ni sorvica nén a Louwis Baidjot, et s' djoca don e 2013. Mins les scoles di Bive di rfondou walon si porshuvnut disk' å djoû d' ouy. Ene pårteye des copineus ont rprins al copinreye di Libin (skepeye e 2014).

Istwere

C' est ene des prumirès copinreyes e walon. Les copineus si rtrovèt on côp par moes.

Å cmince, les rapoûlaedjes estént moennés e troes tåvlêyes ki tournént : ene so les vîyès sacwès, ene so les cayetrs d' asteure, ey ene sol croejhete walone. Mins, avou l' rastrindaedje do nombe di copineus, on a passé a ene seule tåvlêye.

On î djåze tofer walon, mins les soçneus vinèt di payis avou des accints do walon foirt diferins (Basse Årdene, mins eto payis d' Nameur, Hesbaye, evnd.) Mins li grosse pårt des soçneus vinèt di l' Årdene nonnrece.

Produjhaedjes e walon

Li soce eplaida li gazete e walon "Coutcouloudjoû.

Dispu 2003, elle mete so pî les scoles di Bive di rfondou walon.

Elle a amonté sacwants cåbarets walons dispoy 2008.

Sacwants djins k' ont vnou al soce u ås scoles di walon

• Lucyin Mahin, Pierre Otjacques, Yves Gourdin, Louis Baijot (mwaisses adjinçneus a Bietris), Mady Dorchymont (mwaisse adjinçneuse a Bive).
• Arthur Schmitz, Andrée Bacq, Henri Lepage (k' ont moenné lontins des tåvlêyes a Bietris).
• Joseph Bily, Bernard Louis, Emile Pècheur, Pablo Sarachaga, Gilbert Colaud, Michel Francard (k' ont vnou tenawete a Bietris).
• Gérard Avril, k'a vnou lontins ås scoles di Bive, la k' i cåzéve li tchampnwès di Srindå.
• Désiré Malet, Jacques Desmet, Jean-Pierre Dumont, Vincent Delire, Jules Boulard, Angèle Lovinfosse (k' ont vnou on côp u deus a Bive).
• Jacques Dupuis, k' esteut todi la a Bive, et k' a rprins l' copinreye di Libin.
• Yvon Barbazon, Julie Leboutte, Alfred Wanlin, Huguette Lucy, Léon Thomas, Francis Caramin, André Jancart, Pascal Baijot, Joselyne Mostenne, Etienne Alexandre, k' ont fwait des «scoles po les scolîs » replaideyes dins l' Rantoele-gazete, sol tévé waloncåzante, so Wikisourd; ou k' ont pårticipé å «Djåzant atlasse».
• Philippe Boula, li produjheu do «Djåzant atlasse», k' a vnou on côp, et k' a trové clapant ki l' cåzaedje ås scoles dimoréve tofer e walon, çou k' est foû råle dins les soces ravicantisses des ptits lingaedjes di France.