Robert Bauffe
Robert Bauffe a skepyî a Tcheslet e 1931. Il a morou li 26 di decimbe 2006.
Il a scrît des foirt nozés arimés.
Il a stî rprins dins l' Antolodjeye "Scrire" et dins l' antolodjeye des Bourdoneus 1985-1995" Les dijh ans do ptit".
Di s' mestî, il esteut metalo.
Eplaidaedjes
[candjî | candjî l’ côde wiki]
Ses powinmes ont parexhou dins l' Bourdon.
Li soce ALWAC lyi a edité ene ramexhnêye di powinmes, ki l' tite, c' est «S' on vôreut, portant».
Li powezeye da Robert bauffe
[candjî | candjî l’ côde wiki]Les sudjets sont classikes (viyès sovnances, discrijhaedjes di pôvès djins), evnd. Mins gn a eto sacwants powinmes po priyî les djonnes di schaper l' walon.
Sovint, i mostere si «cour grand å lådje» et si håsse di dispåde li bouneur.
- Mi cour, c' est èn ouxh grand å lådje
- Po tos les pôves k' ont des astådjes.
C' est sovint do ût-pîtaedje u do dijh. Les arestaedjes å mitan n' sont nén todi respectés.
Li motlî est co assez ritche. Mins les belès ratourneures (metans «a baxhe-dos») rivnèt dins sacwants powinmes.
Egzimpe di boket
[candjî | candjî l’ côde wiki]Minme poye,[1] dji tchante co
Fåreut i co ki dj' braiye sins rlåtche
Po fé plaijhi ås margougneus ?
Dji les vôreu bén vey e l' plaece[2]
D' èn ome k' a todi l' cour ureus.
On rén m' continte; dji so-st a m'-n åjhe
Po discomeler mes trecas.[3]
Åd triviè d' tot, dj' eva, binåjhe,
Sins djamåy fé d' mes imbaras.
Minme si dji n' a k' sacwants mastokes,
Tot djusse po m' sawè mete å rcoe,
Et si télcôp, li må m' aroke,
Mågré çoula, dj' maçnêye del djoye.[4]
Mi cour, c' est èn ouxh grand å lådje
Po tos les pôves k' ont des astådjes.[5]
Hårdêyes difoûtrinnes
[candjî | candjî l’ côde wiki]
Li Wiccionaire si rsieve di sacwantès fråzes da Robert Bauffe po-z enimådjî des mots k' i gn a.
Vos trouvroz des racsegnes so les ouves da Robert Bauffe, u les ouves zeles-minmes, so Wikisourd e walon.- Sacwants d' ses scrijhaedjes (so l' Aberteke)
Pî-notes
[candjî | candjî l’ côde wiki]- ↑ Kécfeye on djeu d' mots, inte «esse_pouye» (dispouyî d' ttafwait, aprume cwand on a pierdou å djeu) et «poye», veyanmint ki c' est les coks ki tchantèt (les poyes codåsnut).
- ↑ Mwaisse modêye: axhiltance «r'lache» / «place».
- ↑ Mwaisse modêye: «po discom'ler tos mès trècas»
- ↑ Mwaisse modêye: rimaedje «r'cwè» / «jwè».
- ↑ Studyî ås scoles di Bive li 16 di fevrî 2022.